தொழில்பயிற்சி நிலையங்களில் ஜன.16 வரை நேரடி மாணவா் சோ்க்கை

திருவாரூா் மாவட்டத்தில் உள்ள அரசு மற்றும் தனியாா் தொழில் பயிற்சி நிலையங்களில் காலியாக உள்ள இடங்களுக்கு ஜனவரி16 ஆம் தேதி வரை நேரடியாக மாணவ, மாணவிகள் சோ்க்கை நடைபெறுவதாக மாவட்ட ஆட்சியா் வே. சாந்தா தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு:

திருவாரூா் மாவட்டத்தில், நீடாமங்கலம் மற்றும் கோட்டூா்அரசு தொழில் பயிற்சி நிலையங்களில் சேர இணையதள கலந்தாய்வு முடிவடைந்த நிலையில், காலியாக உள்ள இடங்களுக்கான நேரடிச் சோ்க்கை ஜன.16 ஆம் தேதி வரை நடைபெறுகிறது.

தொழில் பயிற்சி நிலையங்களில் பல்வேறு பொறியியல் மற்றும் பொறியியல் அல்லாத தொழில் பிரிவுகளில் சோ்ந்து பயிற்சி பெற 8 ஆம் வகுப்பு மற்றும் 10 ஆம் வகுப்பு தோ்ச்சி பெற்றவா்கள் விண்ணப்பிக்கலாம். தமிழகத்தில் உள்ள தொழில் பயிற்சி நிலைய விவரங்கள், தொழில் பிரிவுகள், இவற்றுக்கான கல்வித் தகுதி, வயது வரம்பு, இட ஒதுக்கீடு ஆகியவை இணையதளத்தில் உள்ள விளக்கக் கையேட்டில் தரப்பட்டுள்ளன.

மாணவா்கள் தாங்கள் சேர விரும்பும் அரசு தொழில் பயிற்சி நிலையங்களுக்கு நேரடியாகச் சென்று விண்ணப்பித்து, விரும்பும் தொழில் பிரிவில் சேரலாம். பயிற்சி பெறும் மாணவா்களுக்கு விலையில்லா சீருடை மற்றும் தையற்கூலி, விலையில்லா மடிக்கணினி, விலையில்லா மிதிவண்டி, விலையில்லா பாடப் புத்தகங்கள், விலையில்லா காலணி, விலையில்லா பேருந்து பயண அட்டை ஆகியவை வழங்கப்படுகின்றன.

இதுதொடா்பான விரிவான விவரங்களுக்கு நீடாமங்கலம், கோட்டூா் பகுதிகளில் உள்ள அரசினா் தொழில் பயிற்சி நிலையங்களை நேரடியாகத் தொடா்பு கொள்ளலாம் எனத் தெரிவித்துள்ளாா்.