நாகர்கோவில் முன்னாள் எம்.பி. என்.டென்னிஸ் காலமானார்

கன்னியாகுமரி மாவட்டம், நாகர்கோவில் மக்களவைத் தொகுதியின் முன்னாள் உறுப்பினர் என்.டென்னிஸ் (84) காலமானார்.

உடல்நலக் குறைவு காரணமாக, தனியார் மருத்துவமனையில் சேர்க்கப்பட்டிருந்த என்.டென்னிஸ் வெள்ளிக்கிழமை பிற்பகலில் இறந்தார்.

கன்னியாகுமரி மாவட்டம், கீழ்குளம் அருகே உள்ள பெரியவிளையைச் சேர்ந்த என்.டென்னிஸ் 1962-ஆம் ஆண்டில் உசரத்துவிளை ஊராட்சித் தலைவராகவும், 1967 முதல் 1971-ஆம் ஆண்டு வரை கிள்ளியூர் ஊராட்சி ஒன்றியத் தலைவராகவும் இருந்துள்ளார்.

1971-ஆம் ஆண்டில் கிள்ளியூர் சட்டப்பேரவைத் தொகுதி உறுப்பினராக வெற்றி பெற்றார். நாகர்கோவில் தொகுதியில் காங்கிரஸ் கட்சி சார்பில் 1980, 1984, 1989, 1991-ஆம் ஆண்டுகளில் நடைபெற்ற மக்களவைத் தேர்தல்களில் வெற்றி பெற்றுள்ளார்.

இதே தொகுதியில், ஜி.கே.மூப்பனார் தலைமையிலான தமிழ் மாநில காங்கிரஸ் சார்பில் 1996, 1998-ஆம் ஆண்டுகளில் போட்டியிட்டு வென்றார். மொத்தம் 6 முறை மக்களவை உறுப்பினராகத் தேர்வு செய்யப்பட்டுள்ளார்.

இவரது உடல் அடக்கம் சனிக்கிழமை (ஜூன் 22) பிற்பகலில் அவரது சொந்த ஊரில் நடைபெறுகிறது.

ஞானதேசிகன் இரங்கல்

சென்னை, ஜூன் 21: மக்களவை முன்னாள் உறுப்பினர் டென்னிஸ் மறைவுக்கு தமிழ்நாடு காங்கிரஸ் கமிட்டித் தலைவர் பி.எஸ். ஞானதேசிகன் இரங்கல் தெரிவித்துள்ளார்.

இது குறித்து அவர் வெள்ளிக்கிழமை வெளியிட்ட செய்தி: முன்னாள் எம்.பி. டென்னிஸ் மறைவுச் செய்தி கேட்டு மிகவும் வருத்தம் அடைந்தேன். காமராஜர், மூப்பனார் போன்ற தலைவர்களுடன் பணியாற்றிய பெருமைக்குரியவர் அவர். 32 வயதில் கிள்ளியூர் ஒன்றியச் சேர்மனாக தேர்ந்தெடுக்கப்பட்ட அவர், 37-ஆவது வயதில் கிள்ளியூர் தொகுதி எம்.எல்.ஏ. ஆனார்.

1971 முதல் 1998 வரை 6 முறை நாகர்கோவில் தொகுதியிலிருந்து மக்களவைக்கு தேர்ந்தெடுக்கப்பட்டவர். அவரது மறைவு குடும்பத்தினருக்கு மட்டுமின்றி காங்கிரஸ் கட்சிக்கும் பேரிழப்பாகும். அவரது மறைவால் வாடும் குடும்பத்தினர் மற்றும் கன்னியாகுமரி மாவட்ட காங்கிரஸ் கட்சியினருக்கு தமிழக காங்கிரஸ் சார்பில் ஆழ்ந்த இரங்கலை தெரிவித்துக்கொள்கிறேன் என்று குறிப்பிட்டுள்ளார்.