டேரன் சமி வேகத்தில் சரிந்தது பஞ்சாப்

கிங்ஸ் லெவன் பஞ்சாபுக்கு எதிரான ஐபிஎல் கிரிக்கெட் போட்டியில் 30 ரன்கள் வித்தியாசத்தில் வெற்றி கண்டது சன்ரைஸர்ஸ் ஹைதராபாத்.

முதலில் பேட் செய்த ஹைதராபாத் 20 ஓவர்களில் 7 விக்கெட் இழப்புக்கு 150 ரன்கள் எடுத்தது. பின்னர் ஆடிய பஞ்சாப் 20 ஓவர்களில் 9 விக்கெட் இழப்புக்கு 120 ரன்கள் மட்டுமே எடுத்தது. பஞ்சாப் மாநிலம் மொஹாலியில் சனிக்கிழமை நடைபெற்ற இந்த ஆட்டத்தில் ஹைதராபாத் அணி, கேமரூன் ஒயிட் தலைமையில் களமிறங்கியது. பஞ்சாப் அணியில் டேவிட் ஹசி நீக்கப்பட்டார்.

டாஸ் வென்ற பஞ்சாப் பீல்டிங்கை தேர்வு செய்தது. இதையடுத்து பேட் செய்த ஹைதராபாத் அணியில் ஷிகர் தவன் 15, விஹாரி 5, ஒயிட் 10, கரண் சர்மா 22 ரன்களில் ஆட்டமிழக்க, 15 ஓவர்களில் 6 விக்கெட் இழப்புக்கு 98 ரன்கள் எடுத்திருந்தது ஹைதராபாத்.

இதன்பிறகு தொடக்க ஆட்டக்காரர் பார்திவ் படேலுடன் இணைந்தார் திசாரா பெரேரா. இந்த ஜோடி 4.1 ஓவர்களில் 48 ரன்கள் சேர்க்க, சரிவிலிருந்து மீண்டது சன்ரைஸர்ஸ். 44 பந்துகளில் அரைசதம் கண்ட படேல், 47 பந்துகளில் 2 சிக்ஸர், 5 பவுண்டரிகளுடன் 61 ரன்கள் எடுத்து ஆட்டமிழந்தார். பெரேரா 19 பந்துகளில் 2 சிக்ஸர், 2 பவுண்டரிகளுடன் ஆட்டமிழக்காமல் 32 ரன்கள் சேர்க்க, 20 ஓவர்களில் 7 விக்கெட் இழப்புக்கு 150 ரன்கள் எடுத்தது ஹைதராபாத். பஞ்சாப் தரப்பில் சந்தீப் சர்மா 4 ஓவர்களில் 21 ரன்களை கொடுத்து 3 விக்கெட்டுகளை வீழ்த்தினார்.

பஞ்சாப் தோல்வி: பின்னர் ஆடிய பஞ்சாப் அணியில் மன்தீப் சிங் ரன் ஏதுமின்றியும், ஷான் மார்ஷ் 18, கில்கிறிஸ்ட் 26, டேவிட் மில்லர் 6 ரன்களிலும் ஆட்டமிழக்க, 9.4 ஓவர்களில் 4 விக்கெட் இழப்புக்கு 51 ரன்கள் என்ற நிலைக்குத் தள்ளப்பட்டது. இதன்பிறகு போமர்ஸ்பேச்-சதீஷ் ஜோடி 5-வது விக்கெட்டுக்கு 51 ரன்கள் சேர்த்தது. அமித் மிஸ்ரா வீசிய 14-வது ஓவரில் தொடர்ச்சியாக இரு சிக்ஸர்களையும், ஒரு பவுண்டரியையும் விளாசிய சதீஷ், 18 பந்துகளில் 25 ரன்கள் எடுத்து ஆட்டமிழந்தார்.

இதன்பிறகு அந்த அணியின் சரிவு தவிர்க்க முடியாததானது. இதனால் அந்த அணியால் 20 ஓவர்களில் 9 விக்கெட் இழப்புக்கு 120 ரன்கள் மட்டுமே எடுக்க முடிந்தது. பார்திவ் படேல் ஆட்டநாயகனாக தேர்வு செய்யப்பட்டார்.

ஹைதராபாத் தரப்பில் டேரன் சமி 4 ஓவர்களில் 22 ரன்களை மட்டுமே கொடுத்து 4 விக்கெட்டுகளை வீழ்த்தினார். இந்த ஆட்டத்தில் வெற்றி கண்டதன் மூலம் பிளே ஆஃப் வாய்ப்பை தக்கவைத்துக் கொண்டுள்ளது ஹைதராபாத்.

சுருக்கமான ஸ்கோர்

ஹைதராபாத்-150/7

(பார்திவ் படேல் 61, பெரேரா 32*, சந்தீப் சர்மா 3வி/21)

பஞ்சாப்-120/9 (போமர்ஸ்பேச் 33*, கில்கிறிஸ்ட் 26, சதீஷ் 25, சமி 4வி/22)