விக்கெட் இழப்பின்றி வென்றது சூப்பர் கிங்ஸ்

கிங்ஸ் லெவன் பஞ்சாபுக்கு எதிரான ஆட்டத்தில் 10 விக்கெட் வித்தியாசத்தில் வெற்றி கண்டது சென்னை சூப்பர் கிங்ஸ்.

சூப்பர் கிங்ஸின் தொடக்க ஆட்டக்காரர்களான மைக் ஹசி 86, முரளி விஜய் 50 ரன்கள் எடுத்து ஆட்டமிழக்காமல் இருந்தனர்.

மொஹாலியில் புதன்கிழமை நடைபெற்ற இந்த ஆட்டத்தில் முதலில் பேட் செய்த பஞ்சாப் 19.5 ஓவர்களில் 138 ரன்களுக்கு ஆட்டமிழந்தது. பின்னர் ஆடிய சூப்பர் கிங்ஸ் 17.2 ஓவர்களில் விக்கெட் இழப்பின்றி 139 ரன்கள் எடுத்து வெற்றி கண்டது. இதன்மூலம் ஐபிஎல் வரலாற்றில் விக்கெட் இழப்பின்றி வெற்றி கண்ட 6-வது அணி என்ற பெருமை சென்னை சூப்பர் கிங்ஸ் வசமானது.

ஹசி சகோதரர்கள் 1,000: பஞ்சாபுக்கு எதிராக 22 ரன்கள் எடுத்தபோது சென்னை சூப்பர் கிங்ஸ் வீரர் மைக் ஹசி, ஐபிஎல் போட்டியில் 1,000 ரன்களை எட்டினார். இதுவரை 31 போட்டிகளில் விளையாடியுள்ள மைக் ஹசி 1,064 ரன்கள் எடுத்துள்ளார்.

பஞ்சாப் அணியில் இடம்பெற்றுள்ள மைக் ஹசியின் சகோதரரான டேவிட் ஹசி, சென்னைக்கு எதிரான 21 ரன்கள் எடுத்தபோது ஐபிஎல் போட்டியில் 1,000 ரன்களை எட்டினார். இதுவரை 49 போட்டிகளில் விளையாடியுள்ள அவர் 1,020 ரன்கள் எடுத்துள்ளார். ஒரே போட்டியில் சகோதரர்கள் இருவரும் 1,000 ரன்களைக் கடந்துள்ளது குறிப்பிடத்தக்கது.