நீச்சல் பயிற்சி முகாம்: சென்னையில் இன்று தொடக்கம்

கோடைக்கால விடுமுறையை முன்னிட்டு சென்னையில் 3 இடங்களில் நீச்சல் பயிற்சி முகாம் நடைபெற உள்ளது. செவ்வாய்க்கிழமை (ஏப்.2) தொடங்கும் இந்த முகாம் ஜூலை மாதம் 11-ம் தேதியுடன் முடிவடைய உள்ளது.

இந்த முகாமுக்கு தமிழ்நாடு விளையாட்டு மேம்பாட்டு ஆணையம் ஏற்பாடு செய்துள்ளது. சென்னையில் அண்ணா சதுக்கத்தில் உள்ள அண்ணா நீச்சல் குளம், செனாய் நகரில் உள்ள செனாய்நகர் நீச்சல் குளம் மற்றும் வேளச்சேரி நீச்சல் வளாகம் ஆகிய 3 நீச்சல் குளங்களில் இந்த முகாம் நடைபெறுகிறது.  அண்ணா நீச்சல் குளத்தில் ஒரு மணி நேரம் நீச்சல் பழகுவதற்கு ஆயிரம் ரூபாயும், செனாய் நகர் மற்றும் வேளச்சேரி நீச்சல் குளத்தில் நீச்சல் பழகுவதற்கு ரூ. 1500 கட்டணமாகச் செலுத்த வேண்டும். இக்கட்டணம், தமிழ்நாடு விளையாட்டு மேம்பாட்டு ஆணையத்தின் பெயரில் வரைவோலையாக அளிக்க வேண்டும்.