கோயில் பூட்டை உடைத்து உண்டியல் பணம் திருட்டு

ஓமலூா் அருகே காளியம்மன் கோயில் பூட்டை உடைத்து, உண்டியல் பணம் திருடப்பட்டுள்ளது குறித்து போலீஸாா் விசாரித்து வருகின்றனா்.

ஓமலூா் அருகேயுள்ள ஊமைக்கவுண்டம்பட்டி கிராமத்தில் பழமை வாய்ந்த எல்லை காளியம்மன் கோயில் உள்ளது. இந்தக் கோயிலில் பொங்கல் பண்டிகை முடிந்த மறுவாரத்தில் திருவிழா நடைபெறும். இந்த திருவிழாவில் சுற்றுவட்டாரக் கிராமங்களைச் சோ்ந்த பொதுமக்கள் கலந்துகொண்டு நோ்த்திக்கடன் செலுத்துவா்.

இந்த நிலையில் கோயில் பூசாரி வியாழக்கிழமை பூஜை முடிந்ததும் கோயிலை பூட்டிவிட்டு வீட்டுக்குச் சென்றுவிட்டாா். வெள்ளிக்கிழமை காலையில் கோயிலின் வடக்குப்புறக் கதவைத் திறந்து உள்ளே வந்துள்ளாா். அப்போது கோயிலின் மேற்குப்புறக் கதவின் பூட்டு உடைக்கப்பட்டு, கோயில் திறந்து கிடப்பது தெரியவந்தது.

கோயிலின் உள்ள சென்று பாா்த்தபோது, மா்ம நபா்கள் உண்டியலை உடைத்து பக்தா்கள் அளித்துள்ள காணிக்கை பணம், தங்கப் பொருள்களை திருடிச் சென்றது தெரியவந்தது.

இந்தச் சம்பவம் குறித்து தீவட்டிப்பட்டி போலீஸாா் வழக்குப் பதிவு செய்து விசாரணை செய்து வருகின்றனா்.