ஒருங்கிணைந்த கல்வித் திட்ட செயல்பாடுகள்: மாவட்ட முதன்மைக் கல்வி அலுவலா் ஆய்வு

கீழ்வேளூா் அருகேயுள்ள ஆழியூா் பள்ளிகளில் நடைபெற்று வரும் ஒருங்கிணைந்த கல்வித் திட்ட செயல்பாடுகளை மாவட்ட முதன்மைக் கல்வி அலுவலா் அ. புகழேந்தி வியாழக்கிழமை ஆய்வு செய்தாா்.

பத்தாம் வகுப்பு, பிளஸ் 2 மாணவா்களுக்கு பள்ளித் திறப்பு குறித்த பெற்றோா் கருத்துக் கேட்புக் கூட்டம் ஆழியூா்அரசு மேல்நிலைப் பள்ளியில் வெள்ளிக்கிழமை நடைபெற்றது. கூட்டத்தில், நாகை மாவட்ட முதன்மைக் கல்வி அலுவலா்அ. புகழேந்தி பங்கேற்று பள்ளித் திறப்பு குறித்து பெற்றோா்கள், ஆசிரியா்கள் கூறியதைக் கேட்டறிந்தாா்.

தொடா்ந்து, ஆழியூா் ஊராட்சி ஒன்றியத் தொடக்கப் பள்ளியில் நடைபெற்றுவரும் கூடுதல் வகுப்பறைகளுக்கான கட்டுமானப் பணிகளை ஆய்வு செய்தாா். பள்ளியில் செயல்படும் வயது வந்தோா் கல்வித் திட்டம், கற்போம், எழுதுவோம் பயிற்சி மையத்தில் ஆய்வு செய்தாா். அடுத்து, கிராமத்தில் வீடு சாா்ந்த கல்விப் பயிற்சியைப் பெறும் மாற்றுத்திறனாளி மாணவா்களின் வீடுகளுக்குச் சென்று அவா்களிடம் கலந்துரையாடி, அரசு சாா்ந்த உதவிகளுக்கான நடவடிக்கைகளை மேற்கொண்டாா்.

ஒருங்கிணைந்த கல்வி உதவித் திட்ட அலுவலா் அ. பீட்டா் பிரான்சிஸ், மாவட்ட ஒருங்கிணைப்பாளா் அ. ஹாஜாமுஜனுதீன், ஆசிரியா் பயிற்றுநா் பா. சத்தியநாராயணன், தலைமையாசிரியா்கள் மா. குமரகுரு (அரசு மேல்நிலைப் பள்ளி), ஆா். டெய்சி (ஊராட்சி ஒன்றியத் தொடக்கப் பள்ளி) மற்றும் ஆசிரியா்கள், மாணவா்களின் பெற்றோா்கள் பங்கேற்றனா்.