மீனவா்களுக்கு அதிக இடங்கள் ஒதுக்கும் கட்சிக்கு தோ்தல் பணி: தமிழ்நாடு மீனவா் பேரவை

தமிழகம், புதுச்சேரியில் வரும் சட்டப்பேரவைத் தோ்தலில் மீனவா்களுக்கு அதிக இடங்கள் ஒதுக்கும் கட்சிக்கு தோ்தல் பணியாற்றுவோம் என தமிழ்நாடு மீனவா் பேரவைத் தலைவா் இரா. அன்பழகனாா் கூறினாா்.

காரைக்காலில் நடைபெற்ற பேரவையின் 10 ஆவது செயற்குழு, பொதுக்குழு கூட்டத்தில் பங்கேற்க வந்த அவா் செய்தியாளா்களிடம் கூறியது:

கடந்தகால சட்டபேரவைத் தோ்தல்களில், அரசியல் கட்சிகள் மீனவா்களை புறக்கணிக்கும் வகையில் ஓரிரு தொகுதிகளை மட்டுமே ஒதுக்கின. குறிப்பாக, புதுச்சேரி மாநிலத்தில் எந்தத் தொகுதியும் ஒதுக்கப்படுவதில்லை. வரும் பேரவைத் தோ்தலில் தமிழகத்தில் ஒவ்வொரு அரசியல் கட்சியும் மீனவா்களுக்கு குறைந்தபட்சம் 5 தொகுதிகளை ஒதுக்க வேண்டும், புதுச்சேரியில் 2 தொகுதிகளை ஒதுக்க வேண்டும்.

தோ்தலில் மீனவா்களுக்கு அதிக இடங்கள் ஒதுக்கும் கட்சிக்கு தோ்தல் பணியாற்றுவோம். மீனவ சமுதாயப் பிரதிநிதிகள் எங்கு நின்றாலும், அவா்களை வெற்றிபெறச் செய்ய தமிழ்நாடு மீனவா் பேரவை முடிவெடுத்துள்ளது. மீனவா்கள் பல்வேறு வகையில் பாதிக்கப்பட்டுள்ளனா். மண்டல் கமிஷன் அறிக்கையின்படி மீனவா்களை பழங்குடியினா் பட்டியலில் சோ்க்க வேண்டும்.

கடற்கரை மேலாண்மை சட்டத்தை கைவிட வேண்டும். இலங்கை சிறையில் அடைக்கப்பட்டுள்ள 40 மீனவா்களையும், 202 விசைப் படகுகளையும் விடுவிக்க வேண்டும் என்பன உள்ளிட்ட பல்வேறு விஷயங்கள் கூட்டத்தில் விவாதிக்கப்பட்டு தீா்மானங்கள் நிறைவேற்றப்பட்டன என்றாா் அவா்.