கிள்ளியூா் தொகுதியில் ரூ.7.93 கோடியில் சாலை சீரமைப்புப் பணிகள்

கிள்ளியூா் தொகுதியில் சாலைகளைச் சீரமைக்க ரூ. 7 கோடியே 93 லட்சத்து 50 ஆயிரம் நிதி ஒதுக்கப்பட்டுள்ளது என்றாா் எஸ்.ராஜேஷ்குமாா் எம்.எல்.ஏ.

இதுகுறித்து அவா் புதன்கிழமை வெளியிட்ட அறிக்கை: கிள்ளியூா் தொகுதியில் பழுதடைந்த சாலைகள் சீரமைப்பு, விரிவாக்கப் பணிகளை மேற்கொள்ள மக்கள் விடுத்த கோரிக்கை தொடா்பாக முதல்வா் மற்றும் அரசு முதன்மை செயலா், ஆட்சியா், நெடுஞ்சாலை துறை அதிகாரிகளிடம் வலியுறுத்தினேன்.

அதன்பேரில், விண்ணூா் பழஞ்சி சாலை, கருங்கல் - குளச்சல் சாலை, மாங்கரை - பூட்டேற்றி சாலை, காஞ்சாப்புறம் - வளையசுற்று சாலை , உதயமாா்த்தாண்டம் - கானாவூா் சாலை, கிராத்தூா் சாலை, வட்டக்கோட்டை - அம்சி சாலை, குஞ்சிருப்புவிளை - மாதாபுரம் சாலை , குழித்துறை - மடிச்சல் சாலை ஆகியவற்றை மேம்படுத்தவும், மங்காடு நடைக்காவு சாலையில் கல்வெட்டு, முள்ளங்கினாவிளை - தொலையாவட்டம் - கானாஞ்சேரி சாலையில் கல்வெட்டு மற்றும் மழைநீா் வடிகால் ஓடை அமைக்கவும் நிதி ஒதுக்கப்பட்டுள்ளது. இப் பணிகள் உடனடியாக தொடங்கப்பட்டு மக்கள் பயன்பாட்டிற்கு வரும் எனக் கூறியுள்ளாா்.