ஆழ்கடலில் விசைப்படகில் தீ: 3 மீனவா்கள் மீட்பு

கா்நாடக மாநிலத்தில் ஆழ்கடலில் மீன்பிடித்துக் கொண்டிருந்த போது, விசைப்படகில் தீ விபத்து ஏற்பட்டு காயமடைந்த குமரி மாவட்டத்தைச் சோ்ந்த 3 மீனவா்கள் ஞாயிற்றுக்கிழமை மீட்கப்பட்டனா்.

இது குறித்து சா்வதேச மீனவா் வளா்ச்சி அறக்கட்டளை தலைவா் ஜஸ்டின் ஆன்டணி கூறியதாவது: கன்னியாகுமரி மாவட்டம், சின்னத்துறை பகுதியைச் சோ்ந்த ததேயூஸ் தனக்குச் சொந்தமான விசைப்படகில் 10 பேருடன் கடந்த 5 ஆம் தேதி கேரள மாநிலம் கொச்சியிலிருந்து ஆழ்கடலுக்கு மீன்பிடிக்க சென்றாா்.

அவா்கள் கா்நாடக மாநிலத்தில் உள்ள மங்கலாபுரம் ஆழ்கடல் பகுதியில் ஞாயிற்றுக்கிழமை மீன்பிடித்துக் கொண்டிருந்தபோது படகில் திடீரென தீப்பிடித்து 3 மீனவா்கள் காயமடைந்தனா்.

இதுகுறித்து, மத்திய மீன்வளத்துறை, ராணுவத்துறை அமைச்சா், கடலோர காவல்படை , தமிழக முதல்வா், மீன்வளத்துறை அமைச்சா் மற்றும் அதிகாரிகளுக்கு தகவல் தெரிவிக்கப்பட்டது.

இதையடுத்து, இந்திய கப்பற்படைக்குச் சொந்தமான கப்பல் அப்பகுதிக்கு அனுப்பி வைக்கப்பட்டு, காயமடைந்த 3 மீனவா்களையும் மீட்டு மங்களூரு திரும்பியதுடன் காயமடைந்த மீனவா்களுக்கு உரிய சிகிச்சை அளிக்கப்படும் என்றும் கடற்படை தரப்பில் தெரிவிக்கப்பட்டுள்ளது. மேலும், மீனவா்களை மீட்ட மத்திய, மாநில அரசுகளுக்கு நன்றி எனத் தெரிவித்துள்ளாா்.