ஹோண்டாவின் முதல் டீசல் கார் "அமேஸ்' இந்தியாவில் அறிமுகம்

ஜப்பான் ஆட்டோ மொபைல் நிறுவனமான ஹோண்டா, டீசலில் செயல்படும் "அமேஸ்' காரை வியாழக்கிழமை அறிமுகம் செய்துள்ளது. இந்தியாவில் இந்நிறுவனம் அறிமுகம் செய்யும் முதல் டீசல் கார் இதுவென்பது குறிப்பிடத்தக்கது.

இது குறித்து புது தில்லியில் இந்திய ஹோண்டா கார் நிறுவனத்தின் தலைவரும் தலைமை செயல்அதிகாரியுமான ஹிரோநோரி கநயாமா தெரிவித்தது: இந்திய வாடிக்கையாளரின் தேவையை அடிப்படையாக கொண்டு அமேஸ் உருவாக்கப்பட்டுள்ளது. டீசல் ரக அமேஸ் ஒரு லிட்டர் டீசலுக்கு 25.8 கி.மீ. தூரம் செல்லும் திறன்கொண்ட என்ஜின் பொருத்தப்பட்டுள்ளது.

பெட்ரோல் ரக அமேஸ், ஒரு லிட்டர் பெட்ரோலுக்கு 18 கி.மீ. தூரம் செல்லக் கூடியது. டீசல் காரின் புது தில்லி விற்பனையக விலை ரூ. 5.99 லட்சம் முதல் ரூ. 7.60 லட்சம் வரை இருக்கும். பெட்ரோல் ரக காரின் விற்பனையக விலை ரூ. 4.99 லட்சம் முதல் ரூ. 7.50 லட்சம் வரை இருக்கும்.

2014-ஆம் ஆண்டுக்குள் ஹோண்டாவின் இந்திய செயல்பாடுகளில் கூடுதலாக ரூ. 2,500 கோடியை முதலீடு செய்யத் திட்டமிட்டிருக்கிறோம். ராஜஸ்தான் மாநிலத்தில் உள்ள ஹோண்டா ஆலையில் புதிய கார் அசெம்பிளி வரிசை, டீசல் என்ஜின் உற்பத்தி ஆகியவற்றில் இந்த தொகை முதலீடு செய்யப்படும் என்றார்.

நான்கு மீட்டர் நீளத்துக்கும் குறைவாக உள்ள, 1200 சிசி அளவுகொண்ட பெட்ரோல் என்ஜின் கார் அல்லது 1500 சிசி அளவுகொண்ட டீசல் என்ஜின் காருக்கு தற்போது 12 சதவீத உற்பத்தி வரி விதிக்கப்படுகிறது. அதிக எண்ணிக்கையில் விற்கும் மாடலாக அமேஸ் வளர்ச்சி பெறும் என தாம் நம்புவதாக அவர் மேலும் தெரிவித்தார். ஹோண்டாவின் அமேஸ் மாடல்,மாருதி சுஸýகி டிஸயருக்குப் போட்டியாக இருக்கும் என கருதப்படுகிறது.