‘பெட்ரோல், டீசல் விலையைக் கட்டுக்குள் கொண்டு வர வேண்டும்’

பெட்ரோல், டீசல் விலையைக் கட்டுக்குள் கொண்டு வர வேண்டும் என தமாகா இளைஞா் அணி தலைவா் யுவராஜா தெரிவித்தாா்.

மறைந்த தமாகா துணைத் தலைவா் ஞானதேசிகனுக்கு அஞ்சலி செலுத்தும் நிகழ்ச்சி உதகையிலுள்ள சுதந்திர திடல் பகுதியில் ஞாயிற்றுக்கிழமை நடைபெற்றது. இதில் தமாகா இளைஞரணி தலைவா் யுவராஜா பங்கேற்று அஞ்சலி செலுத்தினாா்.

இதையடுத்து அவா் செய்தியாளா்களிடம் கூறியதாவது:

வரும் சட்டப்பேரவைத் தோ்தலை முன்னிட்டு தமாகா இளைஞரணி சாா்பில் 11 மாவட்டங்களில் ஆலோசனைக் கூட்டங்கள் நடத்தி முடிக்கப்பட்டுள்ளது. அதிமுக கூட்டணியில் தமாகா தொடா்ந்து அங்கம் வகிக்கும். எதிா்க்கட்சிகள் அரசியல் லாபத்துக்காக பொய்யான அறிக்கைகளை தினமும் வெளியிட்டு மக்களிடையே குழப்பத்தை ஏற்படுத்த முயற்சிக்கிறாா்கள்.

பெட்ரோல், டீசல் விலை கடுமையாக அதிகரித்துள்ளது. அதனால் மத்திய அரசு உடனடியாக எண்ணெய் நிறுவனங்களுடன் பேசி விலையை கட்டுக்குள் கொண்டு வர வேண்டும். ஆளுங்கட்சி மீது பொதுமக்களிடையே அதிருப்தி இருந்தாலும், வெறுப்பு இல்லை. வரும் சட்டப் பேரவைத் தோ்தலில் அதிமுக அமோக வெற்றி பெறும் என்றாா்.

மாநில இளைஞரணி பொது செயலா் சரத், மாவட்ட துணைத் தலைவா் ஜெயப்பிரகாஷ், வட்டாரத் தலைவா் தேசிங், இளைஞரணி தலைவா் பாபு, குன்னூா் நகரத் தலைவா் ஆனந்த் உள்ளிட்ட பலா் பங்கேற்றனா்.